Os veciños de Triacastela recibiron unha formación gratuíta sobre compostaxe doméstica
![Formación compostaxe Triacastela (2)](https://sarriaxa.com/wp-content/uploads/2022/12/Formacion-compostaxe-Triacastela-2-1.jpg)
O Concello de Triacastela celebrou unha xornada de formación gratuíta en compostaxe doméstica para as persoas que se anotaron para recibir un dos 25 composteiros que vén de adquirir o Goberno local cunha subvención da Consellería de Medio Ambiente.
Así, os veciños e veciñas do concello puideron recibir información totalmente gratuíta na Fonte do Lunar para promover a reciclaxe de residuos orgánicos.
En concreto, explicáronlles aos participantes na campaña o que precisan para facer compostaxe, o proceso, que residuos se poden compostar e cales non e os aspectos que condicionan o proceso da compostaxe. Tamén lles ensinaron cando está listo o compost e os seus usos e beneficios.
A campaña ‘Composta os teus residuos’ está ideada para a participación de 25 vivendas pertencentes preferentemente á zona rural, sendo a condición
indispensable posuír un espazo de horta e/ou xardín no que colocar un composteiro.
Esta iniciativa desenvolvese polo Concello de Triacastela en colaboración coa Consellería de Medio Ambiente, Territorio e Vivenda da Xunta de Galicia -no marco do Plan de recuperación, transformación e resiliencia, financiado pola Unión Europea-NextGenerationEU-, e complementa a outras iniciativas desta índole desenvolvidas polo ente municipal.