Paradela lanza o seu Campamento de Verán 2025 con xogos, piscina e excursións
O Concello de Paradela organiza un novo Campamento de Verán 2025, pensado para nenos e nenas de entre 3 e 12 anos.
A iniciativa desenvolverase do 1 de xullo ao 29 de agosto, ambos días incluídos, no Polideportivo do Colexio.
O horario será de 9:00 a 14:00 horas, ofrecendo así unha alternativa lúdica e educativa para os máis pequenos durante as vacacións escolares.
As actividades previstas inclúen xogos, deporte, piscina, visitas á contorna e moita diversión. O campamento está dirixido tanto a nenos e nenas empadroados en Paradela como a aqueles que teñan algún tipo de vinculación co municipio.
A preinscrición poderá realizarse nas oficinas do Concello ata o 24 de xuño e o programa permite escoller entre estadías por semanas, quincenas ou meses completos, adaptándose así ás necesidades das familias.