Pili Madeira: Un novo comezo para unha floraría con historia
No corazón de Sarria, na Rúa da Liberdade 137, atópase unha florería con máis de 40 anos de historia: Pili Madeira. Un negocio que creceu e evolucionou co tempo, pero que sempre mantivo a súa esencia: ofrecer produtos e servizos de calidade, adaptados ás necesidades dos seus clientes.
A súa historia comeza a finais dos anos 70, cando a súa fundadora, Pili, percibe a crecente demanda de flores para diferentes ocasións: desde eventos importantes ata simples detalles para embelecer o fogar. Nese momento, xa xestionaba unha funeraria chamada Madeira, e foi a combinación de ambos nomes o que deu identidade á florería. O que comezou como unha resposta a unha necesidade puntual, pronto se converteu nun negocio sólido e querido pola comunidade.
A EVOLUCIÓN
Ao longo dos anos, Pili Madeira foi testemuña de innumerables momentos importantes na vida de moitas familias da comarca: vodas, nacementos, aniversarios, despedidas... En cada un deses eventos, as flores xogan un papel fundamental, transmitindo emocións e embelecendo os espazos.
Desde os seus inicios até hoxe, a arte floral experimentou unha gran evolución. O que antes se centraba en composicións máis tradicionais, agora transformouse nun concepto onde a harmonía, a proporción, o equilibrio e o punto focal xogan un papel esencial en cada arranxo.
En Pili Madeira, sempre se apostou pola formación e mellora continua para ofrecer aos clientes as tendencias máis actuais e os deseños máis innovadores. Porén, máis alá das técnicas e estilos, o que realmente diferenza esta florería é o trato próximo e personalizado. Moitos dos clientes que comezaron a comprar na florería nos seus primeiros anos seguen confiando nela hoxe en día, e o mesmo acontece cos seus familiares. Non se trata só de entrar a comprar flores, senón de sentirse como na casa.
Nun mundo onde todo avanza a gran velocidade, atopar un negocio onde se mantén a proximidade, o trato amable e a confianza é algo que os clientes valoran enormemente. Coñecer os seus gustos, as súas preferencias e as súas necesidades fai que o servizo sexa máis persoal e satisfactorio tanto para eles como para nós.
OS SEUS SERVIZOS
O negocio medrou e evolucionou co tempo, ampliando o seu catálogo de produtos e servizos. Actualmente, Pili Madeira está especializada en tres grandes áreas.
A decoración de ambientes e eventos, xa que a florería traballa na ambientación de todo tipo de espazos e celebracións. Vodas, comuñóns, aniversarios, eventos corporativos ou calquera ocasión especial na que as flores sexan protagonistas. Desde pequenos detalles ata montaxes florais de gran envergadura, sempre se busca crear ambientes únicos e cheos de personalidade.
Por súa parte, venden na tenda para o público. No establecemento pódense atopar unha gran variedade de produtos, entre os que destacan: Plantas de interior e de xardín, perfectas para decorar o fogar ou regalar. Ramos de agasallo, deseñados para expresar sentimentos en calquera ocasión. Composicións de flor preservada ou silvestre, unha opción ideal para quen buscan beleza e durabilidade nos seus arranxos. Decoración floral personalizada, adaptada ás necesidades e gustos de cada cliente.
Finalmente, os arranxos funerarios, nos que servimos ás familias e ás empresas funerarias.
A REAPERTURA
Despois de máis de cinco anos pechada debido a unha reforma, este Nadal de 2024 marca un momento moi especial para a floraría: a súa reapertura. Pero non é só un regreso, senón un novo comezo cun concepto renovado.
A gran novidade desta reapertura é a incorporación de Bicarelo, unha tenda especializada en detalles para eventos, papelería personalizada, agasallos exclusivos e produtos deseñados para ocasións especiais.
Con esta fusión, Pili Madeira amplía a súa oferta, ofrecendo aos seus clientes unha experiencia máis completa. Agora, os clientes non só poderán atopar flores e decoración, senón tamén complementos para eventos, detalles personalizados e solucións creativas para facer de cada celebración un momento inesquecible. Esta unión nace coa intención de ofrecer un mellor servizo e facilitar a organización de eventos nun só lugar.
O NEGOCIO EN SARRIA
Ao longo dos anos, Pili Madeira converteuse nunha parte importante de Sarria e de toda a comarca. Non só pola súa traxectoria e a súa calidade no traballo, senón porque é un negocio que forma parte da vida de moitas familias. En cada recuncho da comarca hai un ramo, un centro ou unha decoración que saíu desta floraría.
Ademais, o negocio non se limita a Sarria, senón que tamén realiza traballos e eventos en toda a provincia de Lugo e, nalgún momento puntual, máis aló, levando a súa arte floral a diferentes recunchos da comunidade.
Nunha época onde os pequenos comercios loitan por manterse fronte ás grandes superficies, negocios como Pili Madeira demostran que a calidade, a proximidade e a dedicación son valores que seguen sendo moi apreciados.