Proxección e coloquio de 'Negro Púrpura' en Sarria
![NEGRO PURPURA_portada](https://sarriaxa.com/wp-content/uploads/2021/10/NEGRO-PURPURA_portada.jpg)
Hoxe venres, 10 de decembro, na casa da cultura de Sarria terá lugar a proxección da película-documental Negro Púrpura, producida por Illa Bufarda e dirixida por Sabela Iglesias e Adriana P. Villanueva.
O acto dará comezo ás 19:00 horas e contará coa presenza das dúas directoras do film para facer a presentación do mesmo.
Sinopse
Negro Púrpura retrata a Galiza do s. XX a través do Claviceps purpurea, un fungo alucinóxeno que agroma nos cereais e que abre as portas a unha historia tan curiosa, sorprendente e descoñecida como importante no devir da nosa cultura e da economía dunha época. Caruncho, cornecelo, dentón, cornello, grao de corvo… este fungo de mil nomes conéctanos co resto do mundo e alimenta os relatos dende a porta da veciña ata as multinacionais farmacéuticas e a CIA; dende as pragas medievais, pasando pola medicina popular, ata o LSD. Historias esparexidas que deixan un gusto amargo ao pan de centeo e que repercuten traspasados os océanos. Unha codia que garda un miolo delirante.
![negro purpura sarria](https://sarriaxa.com/wp-content/uploads/thumbs/2021/12/negro-purpura-sarria-200x285.jpg)