Quedan aprobados os orzamentos de Láncara para o ano 2026 que ascenden a case 3 millóns de euros
O Pleno do Concello de Láncara aprobou este xoves, 27 de novembro, o orzamento "máis ambicioso da súa historia recente", tal e como defende o Goberno local, xa que ascende a 2.917.864,09 euros, con investimentos de case 1 millón de euros.
O alcalde, Darío Piñeiro, recoñece e valora a implicación da Deputación Provincial de Lugo, que "confirma o seu papel como verdadeiro motor do desenvolvemento rural" ao achegar de case 700.000 euros, o que representa máis do 70 % do total dos investimentos.
“Sen este apoio decidido da institución provincial, sería imposible acometer unha transformación desta envergadura. Resulta especialmente significativo que, mentres a Deputación pon enriba da mesa esta cantidade histórica, a Xunta de Galicia nin está nin se lle espera”, asegura o alcalde, Darío Piñeiro.
O Plan Único da Deputación servirá para mellorar a rede viaria municipal, con 313.221,99 euros que permitirán a pavimentación completa de Airexe, Neira e Sampaio, a construción dun novo camiño ao cemiterio de Láncara e a mellora do acceso de San Pedro a Carracedo, ademais de arranxos en vías públicas de todos os núcleos. Son obras demandadas durante anos polos veciños e veciñas e que “por fin verán a luz”.
Os convenios de cooperación coa Deputación supoñen outro piar fundamental do orzamento. Un total de 250.000 euros permitirán mellorar infraestruturas municipais como os camiños de acceso a Rebordelo, San Paio e Tourelle, o aglomerado da estrada Castelo-Láncara, a construción dun muro de contención en Pedreira e o aglomerado da praza do Outeiro.
Ademais, outros 70.495,17 euros destinaranse á modernización do alumeado público rural con tecnoloxía LED en zonas como A Reboleira-Río, Río-San Martiño e diversos lugares da Pobra de San Xiao, "actuacións corresponden a competencias nas que a Xunta podería colaborar", lembra o rexedor.
Pola súa parte, melloraranse as instalacións do pavillón deportivo municipal grazas a un convenio específico coa Deputación dotado con 145.000 euros.
O Concello de Láncara tamén conseguiu captar fondos da AGADER, que achegará 87.000 euros para actuacións en Augalevada, Villouzán e Monseiro, e do Grupo de Desenvolvemento Rural, que financiará con 17.882,48 euros a rehabilitación ambiental da fonte de Castrodelo. “Estas pequenas achegas de organismos dependentes da Xunta son a única presenza do goberno autonómico nun orzamento de case 3 millóns de euros”.
Tamén haberá unha partida para o Servizo de Axuda no Fogar, que contará con 515.000 euros para garantir a atención ás persoas dependentes. A recollida de lixo disporá de 174.300 euros para manter un servizo diario de calidade, mentres que o alumeado público consumirá 127.000 euros para manter iluminadas todas as parroquias. A Festa da Tenreira, o evento do ano, contará con 40.000 euros para consolidarse como referente comarcal.
O novo orzamento entrará en vigor o 1 de xaneiro de 2026. Para entón, as máquinas xa estarán traballando nas primeiras obras dunha transformación que “marcará un antes e un despois na historia de Láncara”, defenden.
"Estamos ante un momento histórico para Láncara. Nunca antes se investira tanto no noso municipio", afirma Darío Piñeiro. "A Deputación de Lugo demóstranos cada día que si é posible apoiar aos concellos rurais con feitos, non con palabras. Mentres uns poñen 700.000 euros enriba da mesa, outros nin sequera se senten a falar con nós. A mensaxe é clara: Láncara non está soa", concluíu o rexedor lancarés.