Saborea a túa provincia exalta en Láncara os produtos de proximidade
![saborea a tua provincia lancara](https://sarriaxa.com/wp-content/uploads/2021/08/saborea-a-tua-provincia-lancara-1.jpg)
A Deputada de Réxime Interior, Promoción do Territorio e Turismo, Pilar García Porto, e o Alcalde de Láncara, Darío Piñeiro, participaron este sábado no programa da Deputación Saborea a túa provincia que acolleu a praza dos Labregos da Pobra de San Xiao, en Láncara.
Durante toda a xornada sucedéronse as degustacións gastronómicas, a maxia do Mago Rafa, a música de Val de Láncara e de Jotinho’s, a cociña en directo, os obradoiros de cociña para os máis pequenos da casa e os sorteos. No autobús-cociña do programa, o cociñeiro Santi Almuíña do Mesón Colón (Nadela) cociñou galo de Mos en tres coccións con queixo San Simón, unha receita que explicou polo miúdo e da que deu a proba ás persoas asistentes. Así mesmo, dende a asociación de criadores da Galiña de Mos (AVIMÓS) ofreceron unha charla divulgativa sobre o traballo que se realiza dende o colectivo e as singularidades desta raza.
O programa Saborea a túa provincia intégrase no Plan de Impulso da Economía da Provincia que lanzou a Deputación para apoiar e dinamizar os sectores máis afectados polo impacto da pandemia, como son a hostalería, o turismo, o comercio local e os pequenos produtores.