Samos celebrou unhas festas patronais cunha participación e ambiente que non se vivía dende hai anos
As festas patronais de Samos na honra a San Benito converteron esta fin de semana a localidade nun fervedoiro de xente e ledicia, recuperando un ambiente festivo que, segundo comentaban moitos dos asistentes, non se vía na vila dende había máis de dezaoito anos.
Tanto o venres como o sábado rexistrouse unha notable afluencia de público, con rúas e prazas ateigadas de persoas que gozaron dunha programación variada e do reencontro coa tradición.
A alcaldesa de Samos, Chus López, valorou de maneira moi positiva o desenvolvemento das festas, subliñando a emoción compartida pola veciñanza ao ver novamente tanta xente no pobo e sentir de novo a vida e a alegría nas rúas. “Estaban todos encantados de volver ter festas así, había moitísima emoción e satisfacción por recuperar estas celebracións que xa facían moita falta”, destacou.
Un dos momentos máis salientables foi o concerto do músico Xabier Díaz, que conseguiu implicar ao público co seu repertorio de música tradicional galega. Varias cantareiras de Samos subiron ao escenario para cantar e bailar, nun ambiente festivo que, segundo a rexedora, foi “unha marabilla”.