Denuncian que a Xunta deixa en risco as vivendas comunitarias de Samos ao denegar unha subvención esencial
O Concello de Samos expresou a súa indignación tras recibir a comunicación oficial da Xunta de Galicia pola que se lle denega unha subvención de case 40.000 euros destinada a cubrir parte dos gastos das vivendas sociais comunitarias, un servizo fundamental para a atención das persoas maiores e dependentes do municipio. Segundo o goberno local, esta decisión fai perigar directamente a viabilidade dun recurso imprescindible para a veciñanza.
A alcaldesa, Chus López, expresou “o fondo malestar do goberno municipal ante unha medida que supón un novo golpe aos servizos sociais dos concellos, especialmente dos rurais, cada vez máis afogados por unha política continuada de recortes e falta de compromiso por parte da administración autonómica”.
O executivo local lembra que a propia Lei de servizos sociais de Galicia establece que calquera atribución de competencias ás entidades locais en materias de titularidade autonómica debe ir acompañada da correspondente transferencia de medios económicos, materiais e persoais. Porén, segundo sinalan, esta previsión legal non se cumpre na práctica diaria dos concellos.
“No caso das vivendas comunitarias, falamos dun servizo imprescindible para asegurar unha atención digna ás persoas maiores, asumido case na súa totalidade polo Concello, sen que a administración autonómica aporte os recursos necesarios para mantelo. É unha situación inxusta, insostíbel e que pon en risco a calidade da atención que recibe a veciñanza”, explicou a rexedora.
Desde o Concello de Samos avanzan que seguirán defendendo con firmeza os intereses dos seus habitantes e esixindo que a Xunta cumpra coa lei e coas obrigas de financiamento que lle corresponden. “Non é de recibo obrigarnos a asumir competencias alleas sen achegar un só euro para financialas”, concluíu o goberno local.