Samos reabre a súa Oficina de Turismo para ofrecer unha atención personalizada durante o verán
Coa chegada do verán e o incremento de visitantes ao municipio, o Concello de Samos reabre a súa Oficina de Turismo, un espazo fundamental para ofrecer información e orientación tanto a turistas como a peregrinos que escollen este enclave do Camiño de Santiago.
A oficina permanecerá aberta de martes a sábado en horario de mañá, de 10:00 a 13:30 horas, e tamén polas tardes, de 16:30 a 18:00 horas. Os domingos, atenderá ao público entre as 11:00 e as 13:30 horas. Como é habitual, os luns, as tardes dos domingos e os días festivos a oficina permanecerá pechada.
A reapertura responde á vontade do Concello de reforzar a atención ao visitante nun dos períodos de maior afluencia turística do ano, facilitando o acceso á información sobre recursos patrimoniais, naturais e culturais, así como ás rutas e servizos locais.
Samos, recoñecido polo seu impresionante mosteiro beneditino e o seu val paisaxístico, continúa consolidándose como unha das paradas máis emblemáticas do Camiño Francés.