Sarria abre o prazo para que os clubs reserven as instalacións deportivas municipais
A Concellería de Deportes do Concello de Sarria vén de anunciar a apertura do prazo para que os clubs deportivos poidan solicitar o uso das instalacións municipais de cara á próxima tempada.
As entidades interesadas deberán presentar un formulario no que se detallen as franxas horarias preferentes para os adestramentos, así como o número de participantes previsto. Tamén se solicita información sobre o número de licenzas federativas no eido do deporte feminino, de menores de idade, da práctica deportiva de base e da modalidade adaptada. Ademais, deberán indicar o número de socios do club, a antigüidade da entidade e achegar unha fotocopia do documento que acredite a súa inscrición no Rexistro de Entidades Deportivas.
A solicitude pode descargarse directamente a través da sede electrónica do Concello ou ben recollerse de xeito presencial nas oficinas municipais.
O prazo permanecerá aberto ata o domingo 4 de agosto, incluído. Dende o consistorio lembran a importancia de presentar toda a documentación dentro do período establecido para garantir unha correcta planificación da distribución dos espazos deportivos ao longo da tempada.