Sarria acolle a estrea do documental ‘Sempre en Galicia’, que homenaxea o galeguismo na emigración
A Casa da Cultura de Sarria converterase este xoves, 6 de novembro, ás 20:00 horas, no escenario da estrea do documental Sempre en Galicia, voz e pensamento galeguista na emigración, dirixido polo cineasta Xan Leira.
A proxección enmárcase nun acto de homenaxe polo 75 aniversario da creación do emblemático programa de radio da emigración galega, no que colaborou Yolanda Díaz Gallego e que contribuíu á difusión do pensamento galeguista fóra das fronteiras.
O documental afonda na memoria histórica do galeguismo no exilio e pon en valor o papel da diáspora na defensa da identidade cultural e política de Galicia.
No evento participarán o propio director, Xan Leira; Manuel Suárez, en representación do Patronato da Cultura Galega; Yolanda Díaz Gallego, colaboradora do programa radiofónico que inspira o documental; e César No, concelleiro de Cultura do Concello de Sarria. A sesión terá lugar no Salón de Actos da Casa da Cultura.
A iniciativa conta coa colaboración da Deputación de Lugo, o Patronato da Cultura Galega e o Concello de Sarria, nun acto que busca reivindicar o legado intelectual e cívico do exilio galeguista e achegar ao público contemporáneo a súa contribución fundamental á historia do país.