Sarria acolle unha tarde de contos e creatividade para reivindicar o 25N
A Biblioteca Municipal converterase este sábado 29 de novembro, a partir das 18:00 horas, nun espazo dedicado á imaxinación, a reflexión e a participación das crianzas cunha nova sesión de historias e creatividade.
A actividade inclúe a narración de “Arturo e Clementina”, a obra de Adela Turin que invita a pensar sobre a igualdade de xénero e o respecto dentro das relacións persoais, ofrecendo unha mensaxe adaptada ao público máis novo.
Tras o relato, os nenos e nenas poderán participar nun obradoiro de manualidades pensado para que expresen as súas ideas, tomen conciencia e se involucren activamente na conmemoración do 25N, o Día Internacional da Eliminación da Violencia contra as Mulleres. A proposta está dirixida ao público infantil e contará con entrada libre ata completar aforo.