Sarria acollerá a alfombra adicada ao Camiño Francés
A comisión xestora de entidades alfombristas do Camiño de Santiago, con sede en Ponteareas, elixiu a Sarria como representante do Camiño Francés.
Esta alfombra está dentro do marco de O teu Xacobeo, que é un programa de axudas específicas para a dinamización sociocultural do Camiño Santiago e a promoción do Xacobeo 2021-22, promovido pola Xunta de Galicia. A alfombra que se vai a realizar, englóbase no proxecto denominado Alfombras para o Camiño, co que se quere poñer en relevo os diversos camiños que conflúen en Santiago de Compostela, a través de algo, como son as alfombras de flores que cada ano se realizan en centenares de vilas e pobos de Galicia, con motivo das festas do Corpus Christi.
Para iso alfombristas de Ponteareas e outras localidades desprazaranse a Sarria o sábado día 12 de xuño, para realizar esa alfombra ante a Igrexa de San Salvador de Sarria, na rúa Maior. A alfombra reproducirá motivos sacados do Claustro do Mosteiro da Magdalena e o escudo da Orde da Merced.
Peregrinos en Sarria
A octoxenaria vila de Sarria foi lugar de paso de peregrinos dende a Idade Media, aínda que non figura no Códice Calixtino, a súa historia está ligada ás peregrinacións. Froito deste florecemento cultural e artístico foron a fundación por toda a comarca de diversos mosteiros como Santo Estevo de Calvor (785), Santa María de Corvelle (857) ou San Mateo de Vilapedre (segunda metade do X), San Martiño e Santiago de Barbadelo, San Paio de Piñeira, Santiago de Mortoláns, San Paio de Cesar, San Salvador de Barxa, San Salvador de Rosende, San Mamede de Pinza, San Pedro de Taíde...
Tamén relacionado co Camiño hai que citar o Mosteiro da Magdalena, fundado a principios do S. XIII como hospital e albergue para descanso e abrigo dos peregrinos, por dous relixiosos italianos da Orde dos Bienaventurados Mártires de Cristo.
Sarria é unha vila unida á tradición xacobea ao ser atravesada polo Camiño de Santiago Francés declarado como Ben Patrimonio da Humanidade pola UNESCO, sendo a localidade máis poboada do leste en Galicia. Atópase a 111 km de Santiago polo que xa é un punto válido para o peregrinaxe a pé, xa que a distancia mínima para obter a Compostela son 100km. Por este motivo, peregrinos de todas as linguas, nacionalidades e culturas deciden iniciar aquí este roteiro secular, seguidos por diversas motivacións.
