Sarria celebra a Milla Urbana o 31 de decembro con premios en vales para o comercio local
O Concello de Sarria organiza un ano máis a Milla Urbana, que se celebrará o 31 de decembro a partir das 18:00 horas. A participación está limitada a 400 persoas, e as inscricións xa están abertas.
A carreira contará con categorías feminina e masculina en 1ª, 2ª e 3ª, e a saída terá lugar desde a rotonda situada na estrada que vén de Samos, mentres que a meta estará ao carón do Hotel Roma. O percorrido discorre por un circuíto urbano en liña recta pola rúa Liberdade.
Haberá premios en vales para gastar no comercio local para os gañadores absolutos: o primeiro clasificado recibirá un vale de 150 euros, o segundo 100 euros e o terceiro 50 euros, tanto en categoría masculina como feminina.
A entrega de dorsais realizarase o mesmo día da proba, a partir das 16:00 horas no pavillón dos Institutos de Sarria. Desde a organización destacan a importancia desta iniciativa, que combina deporte, participación cidadá e apoio ao comercio local.