Sarria celebra o 25 de outubro a XIX Festa dos Maiores no Pavillón dos Institutos
O Concello de Sarria organiza o vindeiro 25 de outubro a décimo novena edición da Festa dos Maiores, unha cita xa consolidada no calendario local que busca recoñecer e agradecer o papel da veciñanza de máis idade na vida social e comunitaria.
O evento celebrarase no Pavillón de Deportes dos Institutos e contará cun programa cheo de música, convivencia e emocións compartidas.
A xornada comezará ás 13:30 horas coa actuación do grupo Peleriños, seguida dun xantar de confraternidade ás 14:00 horas. Pola tarde, ás 16:30, terá lugar a tradicional homenaxe ás parellas asistentes que este ano celebraron as súas vodas de ouro, un dos momentos máis emotivos da festa. O programa pecharase ás 17:30 coa actuación da Banda de Música de Sarria, que porá o broche final á celebración.
O prezo de inscrición é de 10 euros por persoa e de 20 euros para acompañantes. As persoas interesadas poderán anotarse no Concello entre o 6 e o 15 de outubro, en horario de 09:30 a 13:30 horas.