Sarria impulsa a compostaxe doméstica cunha sesión formativa
A Casa da Cultura de Sarria acollerá unha sesión formativa sobre compostaxe doméstica destinada a todos os veciños e veciñas interesados en reciclar os seus residuos orgánicos no fogar.
O evento, que terá lugar o martes 8, dará comezo ás 19.00 horas e ofrecerá información detallada sobre o proceso de compostaxe e os seus beneficios ambientais.
Ao remate da formación, os participantes recibirán un manual de compostaxe, un composteiro e un aireador para poñer en práctica o aprendido. Para poder acceder a este material, é necesario dispoñer dun espazo mínimo de 50 m² para a instalación do composteiro.
Dado que a dispoñibilidade de composteiros é limitada, recoméndase realizar unha inscrición previa a través da web https://sarria.rsu.gal/. Ademais, durante o ano 2025 levarase a cabo un seguimento para supervisar o proceso de compostaxe e garantir o seu correcto desenvolvemento.
Esta iniciativa conta co apoio financeiro da Consellería de Medio Ambiente e Ordenación do Territorio, así como do Plan de Recuperación, Transformación e Resiliencia do Goberno de España, financiado pola Unión Europea a través do programa NextGenerationEU.