Sarria organiza unha fin de semana chea de iniciativas para conmemorar o 8M
O Concello de Sarria, a través das concellerías de Igualdade, Cultura e Deportes, organiza unha fin de semana chea de eventos para conmemorar o Día Internacional da Muller (8M).
As actividades, que terán lugar entre o venres 7 e o domingo 9 de marzo, buscan promover a igualdade e visibilizar a loita das mulleres na sociedade.
O venres 7 de marzo iniciarase a programación cun acto institucional ás 13.30 horas na Casa do Concello, onde se procederá á lectura do manifesto polo 8M. Xa pola noite, ás 20.00 horas, a Casa da Cultura acollerá a presentación do poemario AMOR(EXIA) da escritora María Barrado García, unha obra que convida á reflexión sobre o amor e a identidade.
O sábado 8 de marzo, a Rúa da Liberdade será o escenario da VIII Carreira da Muller Vivas e Iguais, unha iniciativa que combina deporte e reivindicación, promovendo a participación activa das mulleres na sociedade.
Para pechar a fin de semana, o domingo 9 de marzo, ás 13.00 horas, a Casa da Cultura será o escenario dun concerto especial a cargo da Banda de Música da Comarca de Sarria, un evento dedicado ás mulleres.
Con esta programación, Sarria reafirma o seu compromiso coa igualdade e a visibilización da muller, cunha proposta variada que abrangue cultura, deporte e reflexión social.