Sarria prepárase para o festival 'Move os marcos', a próxima fin de semana
Mover os marcos do cotián, remexer conciencias, tecer redes de afectos e gozar do lecer en comunidade. Baixo esas premisas, Sarria acollerá o vindeiro domingo, 18 de maio, o festival 'Move os marcos', impulsado pola Vicepresidencia da Deputación de Lugo.
Música, literatura, activismo e gastronomía conxúganse no programa deste encontro pensado para convocar público de toda Galicia que se inspira na lembranza do promotor cultural sarriao Marcos López, figura imprescindible da edición e do audiovisual galego nas dúas últimas décadas
Os concertos de Mondra, de estrea do seu segundo álbum “De Ronda”, e o cuarteto De Vacas locen nun elenco de propostas fiadas pola reivindicación da diversidade e dunha produción cultural comprometida coa lingua e o territorio, que se desenvolverán entre o parque do Chanto e O Meigallo.
Move os marcos inclúe actividades e espazos para a creación e a reflexión, cun recital poético musical, intervencións artísticas colectivas ou unha palestra sobre dereitos das persoas LGTB e dereitos lingüísticos nun contexto de auxe dos discursos de odio, así como unha ampla axenda pensada para a cativada, con contacontos, construción de xoguetes sonoros, obradoiros creativos e espazos de lecer libre.
O vicepresidente da Deputación de Lugo Efrén Castro e a deputada de Cultura Iria Castro presentaron Move os marcos como “unha conxunción de música e actividades que reivindican o poder transformador da cultura e que converterán Sarria nun punto de encontro para público de toda Galiza nunha fin de semana de reivindicación e de celebración da lingua e da cultura propia, polo Día das Letras Galegas”.
Os responsables provinciais destacaron “a calidade da proposta musical con Mondra e De Vacas, referentes da fornada de artistas que están a revolucionar o panorama da música en galego” nun programa “artellado coa premisa de crear unha axenda que anime ao público a quedar en Sarria durante toda a xornada”
Move os marcos conta tamén coa implicación do tecido cultural e asociativo de Sarria, con actuacións de Peleriños e a colaboración de Meigas e Trasgos. O recinto do festival acollerá tamén unha zona gastronómica cunha selección de produtos da comarca.
Programa
- 11.30 h. Alborada. AC Peleriños de Sarria. Bulevar-Malecón-Parque do Chanto
- 12.00 h. Pregón do inicio da festa
- 12.30 h. Recital Canto en Parada. Peza escénica multidisciplinar. Luis Alonso (poesía) e Rafa Mallo (percusión)
- 12.45 h. Parolada diversa: Move os teus marcos. Participan Carlos Callón (escritor e profesor), Daniela Fernández (historiadora e investigadora da memoria LGTB en Galiza), Braulio Vilariño (organización Festival Agrocuir), Ana Ojea (coordinadora da Rede Educativa de Apoio LGTBIQ+ de Galiza), Chené Gómez (ONGD Creat Apoio Psicosocial a través da arte en Gaza). Modera: Eva Mejuto (xornalista, escritora e activista)
- 14.30 h. Sesión vermú e xantar festivo. A Duendeneta Dilleis
- 16.00 h. Visita guiada á exposición Galegoza. A canción en galego
- 16.30 h. Pandereteiras AC Peleriños de Sarria
- 17.00 h. De vacas
- 18.00 h. Mondra
- 19.00 h. De Vacas & Mondra nunha colaboración especial e inédita para Move os marcos
Actividades para a cativada
- 12.30 h. Sesión de contos. O conto do Traxugas. César No
- 12.30 h. a 14.30 h. Obradoiro Xoguetes Sonoros: asubío de abelá, carrizo de noz e ruxerruxe. Xaneco Tubío.
- 13.00 h. Obradoiro. Pulseiras coloridas.
- 16.30 h. a 18.30 h. Obradoiro Xoguetes Sonoros: asubío de abelá, carrizo de noz e ruxerruxe. Xaneco Tubío.
- 16.30 h. Obradoiro. Retrato en Collage Palestina. Taller creativo para traballar en parellas a técnica do collage.
- 18.00 h. Obradoiro. Abano de cores.
Outras actividades
As outras voces. Exposición fotográfica sobre o traballo da ONGD Creart na franxa de Gaza.
Artivista “Enlázate a Gaza”. Intervención artística colectiva arredor da situación do pobo palestino.
Tecer sobre o valado: Galiza. Intervención artística colectiva con elementos naturais e coloridos en valados instalados no espazo do festival.
Andel de cores. Libraría Galicia 1932. Espazo de venda de libros.
Zona Gastro. Espazo con produtos de alimentación seleccionados da comarca.