Son de Corda leva a Sarria o proxecto ‘Na Casa Delas’ cun tributo musical ás grandes poetas galegas
O cuarteto vocal Son de Corda presentará este sábado 29 de novembro ás 20.00 horas o proxecto Na Casa Delas na Casa da Cultura de Sarria, unha proposta que combina música e poesía para render homenaxe a seis figuras fundamentais da literatura galega: Marica Campo, Luz Pozo, Olalla Cociña, María Mariño, Xela Arias e Olga Novo.
As voces de Esperanza Iglesias, soprano, Carmen Prendes, contralto, Fernando G. Jácome, tenor, e Antón Castro, baixo, darán forma ao son característico de Son de Corda. Xunto ao acompañamento ao piano de Raúl Rodríguez e ao violín de Aldara Palmeiro, o grupo ofrecerá un repertorio centrado nas pezas baseadas nos poemas das autoras homenaxeadas, ademais doutras interpretacións que completarán o concerto.
A actuación incluirá a interpretación de composicións creadas a partir de versos destas autoras, acompañadas dun vídeo no que se recolle a visita ás súas casas, permitindo achegar ao público unha mirada máis íntima á vida e ao legado das poetas.