Trasliste acollerá a IV Xornada sobre as alternativas ao uso do petróleo nas aplicacións agrícolas
A parroquia de Trasliste, no municipio de Láncara, será o escenario o próximo 10 de decembro da IV Xornada sobre as alternativas ao uso do petróleo en aplicacións agrícolas, un encontro organizado polo Museo Vivo e Integrado do Campo e da Locomoción Agraria (Muvicla).
A xornada busca analizar solucións enerxéticas sostibles e expoñer experiencias prácticas que permitan reducir a dependencia do petróleo na actividade agraria.
A programación comezará ás 10:00 horas coa recepción de asistentes e, a continuación, coa benvida a cargo de María J. Bande Castro, presidenta do Muvicla. Pouco despois, Jesús Combarro Pereira, director de proxectos agropecuarios de Abanca, inaugurará oficialmente o encontro.
Ás 10.25 horas, Marcos Vázquez Marey, director do museo, presentará a ponencia “Que fixemos coa enerxía e o que faremos en MUVICLA”. Seguidamente, Inés Santé Rivera, profesora da Escola Politécnica Superior de Enxeñaría de Lugo, profundará na relación entre enerxía e territorio coa conferencia “A enerxía e o territorio, o gran binomio”.
Tras unha pausa para o café, ás 11.25 horas o director da Banda Filarmónica de Lugo, Iván Martínez Sabio, ofrecerá unha intervención musical en directo.
A sesión técnica continuará ás 12.00 horas con José Antonio López Sierra, presidente do Colexio de Enxeñeiros Agrícolas de Lugo, quen analizará o aproveitamento enerxético e o porcino. Logo, ás 12.30 horas, Ana Castro Montero, especialista de Fendt, abordará a aposta do grupo AGCO pola electrificación da maquinaria agrícola.
A partir das 13:00 horas terá lugar un caso práctico centrado nas instalacións fotovoltaicas en agricultura, impartido por Pablo Rodríguez Varela, técnico de Instaladores Monfortinos. A mañá pecharase cunha visita guiada polas instalacións do museo antes da comida no propio recinto.
Xa pola tarde, a actividade retomarase ás 16.00 horas cunha mesa redonda titulada “Agricultura e alimentación, con que enerxía?”, moderada polo investigador Quico Ónega López e na que participarán gandeiros, docentes e enxeñeiros vinculados ao sector primario. O debate porá enriba da mesa os desafíos enerxéticos actuais e as oportunidades que ofrece a transición cara a modelos máis sostibles.
Ás 18:00 horas presentaranse varias publicacións de anos anteriores e, pouco despois, a veterinaria e xefa territorial da Consellería do Medio Rural, Olga Iglesias Fontal, clausurará a xornada. O peche chegará cunha interpretación musical de “Airíños Aires”, coa gaita de Marcos Vázquez Marey e acompañado na percusión por Brais Vázquez Bande.
A organización lembra que o aforo é limitado e que é imprescindible confirmar asistencia a través do correo electrónico do museo. Ademais, lembran que elaboraron unha publicación sobre o conversado nas xornadas desenvolvidas ata o momento.