Tremeterra Fest anuncia dúas potentes confirmacións para o IV Encontro Soundsystem da Terra Brava
O Tremeterra Fest do Incio vén de desvelar dúas novas incorporacións ao cartel do seu IV Encontro Soundsystem da Terra Brava, que se celebrará os días 29 e 30 de agosto no espectacular entorno do Encoro de Vilasouto.
A primeira confirmación é Ishan Sound, recoñecido produtor e selector da escena underground de Bristol, coñecida como a "mad city" británica polo seu dinamismo musical. O seu estilo mestura ritmos steppers cunha estética que bebe tanto do dixital como do analóxico, sempre coa mirada posta na tradición soundsystem da súa cidade natal.
Completando esta nova rolda de artistas, súmase ao cartel Rider Shafique, unha das voces máis versátiles e singulares do panorama británico. Co seu estilo inconfundible, Shafique transita con naturalidade por xéneros como o dub, drum & bass, dubstep, dancehall e mesmo o jazz, ofrecendo unha proposta musical rica, híbrida e profundamente persoal.
Con estas confirmacións, o Tremeterra Fest reafírmase como unha das citas imprescindibles para os amantes do soundsystem, a música consciente e as paisaxes sonoras que conectan co territorio e a cultura de raíz.