Triacastela acolleu a XIII Feira de Artesanía e Produtos cun gran éxito nas actividades
A conselleira do Medio Rural, María José Gómez, foi a encargada de dar o pregón na décimo terceira edición da Feira de Artesanía e Produtos da Zona de Triacastela, un evento que cualificou como unha auténtica xanela de promoción para o sector agroalimentario galego.
No seu discurso puxo en valor a cultura, as tradicións e a riqueza paisaxística desta localidade lucense, marcada ademais pola súa estreita relación co Camiño de Santiago.
A representante autonómica lembrou que Triacastela foi clave na recuperación de razas autóctonas, xa que a mediados dos anos noventa alí comezou a revitalización do porco celta, ao tempo que se impulsaba a cría de vacas cachenas. Neste senso, destacou que estas iniciativas non só permiten conservar especies singulares, senón que tamén manteñen viva a actividade económica no rural, crean emprego e fortalecen a vida das aldeas.
Gómez subliñou igualmente que a feira é un escaparate de produtos de gran calidade e tradición, que contribúen a dinamizar a economía local e a manter vivas as vilas. O encontro incluíu degustacións gastronómicas con selos de calidade diferenciada promovidos pola Consellería do Medio Rural, ademais dunha food truck de Galicia Sabe A Mar, dependente da Consellería do Mar.
A programación completouse con obradoiros de Artesanía de Galicia e cun taller de cianotipias impartido por María José Martínez e José Carrera, do obradoiro Peixesapop, actividade patrocinada pola Fundación Artesanía de Galicia, vinculada á Consellería de Emprego, Comercio e Emigración.