Val do Mao, no Incio, celebrará as súas grandes festas os días 15 e 16 de maio
A parroquia de Val do Mao, no Concello do Incio, xa ten todo preparado para celebrar as súas tradicionais festas na honra a San Eufrasio, os días 15 e 16 de maio de 2025.
O día 15, a xornada comezará ás 11:00 horas coa misa solemne e ás 13:30 horas terá lugar a procesión seguida da sesión vermú, que estará amenizada polo grupo de música tradicional Biouteiro Astelu. Xa pola noite, a partir das 21:00 horas, celebrarase unha cea popular animada polo grupo Tania Veiras, que fará vibrar ao público co seu repertorio.
O día 16, a programación repítese coa misa maior ás 13:30 horas, procesión e sesión vermú a cargo do grupo Zona Zero, que tamén será un dos protagonistas da noite. A partir das 22:00 horas terá lugar a gran verbena con Zona Zero e a orquestra Miramar, que pecharán as festas por todo o alto con música e festa para todos os públicos.
As festas contan coa colaboración de numerosos negocios locais e co apoio da Deputación de Lugo a través da área de Cultura, demostrando unha vez máis a forza do tecido asociativo e comercial da zona.
Veciños e visitantes están convidados a participar e gozar destas festas populares, que mesturan o mellor da tradición relixiosa e cultural co ambiente festivo tan característico das celebracións do rural galego.