Veciños de Río en Láncara participan nun curso de arte floral impulsado pola Deputación

A primeira sesión desenvolveuse no Local Social do colexio con elaboración de centros para fogares e cemiterios

A Asociación de Veciños San Martiño de Río, no concello de Láncara, organizou o pasado sábado 13 a primeira parte dun curso de arte floral.

A actividade, que conta co apoio da Deputación de Lugo, celebrouse no Local Social do colexio da parroquia e reuniu a veciños e veciñas interesados nesta disciplina creativa.

Durante a sesión, as persoas participantes aprenderon a confeccionar centros con flores naturais, algúns deles pensados para seren colocados nos fogares e outros destinados ao cemiterio.

Esta iniciativa supón unha oportunidade para achegar coñecementos prácticos á comunidade, ao tempo que promove a convivencia e a posta en valor das tradicións vinculadas ao uso das flores.