Vilas en Flor consolida en varios municipios o modelo de vila máis verde e sostible
Máis de corenta municipios galegos de menos de 40.000 habitantes participaron no Fórum Carballo na gala anual de Vilas en Flor Galicia, un programa que recoñece con entre 1 e 5 Flores de Honra a xestión sostible dos espazos verdes, a educación ambiental e a implicación da veciñanza no coidado da contorna.
Impulsada pola Fundación Juana de Vega xunto con ASVINOR e AGAEXAR, a iniciativa chega este ano á súa 8ª edición con 41 concellos adheridos das catro provincias galegas.
No máximo recoñecemento, con 4 Flores de Honra, están Allariz, Carballo, Chantada, Salceda de Caselas e Tomiño. Con 3 Flores, foron premiados Arteixo, Caldas de Reis, Cambados, Carballiño, Lalín, A Laracha, As Pontes de García Rodríguez, O Rosal, Salvaterra de Miño, San Sadurniño, As Somozas, Vilagarcía de Arousa e Vimianzo.
En categoría de 2 Flores de Honra destacaron Abegondo, Cuntis, Curtis, A Guarda, Leiro, Manzaneda, Marín, Mondariz-Balneario, Oza-Cesuras, Ponteareas, Sada, Sanxenxo, Sarria e Tui, mentres que Covelo, Culleredo, A Estrada, Mondariz, Mos, As Neves, Pobra de Trives, Ponteceso e San Xoán de Río recibiron 1 Flor de Honra.
Así, na provincia da Coruña, seis concellos da contorna da Coruña e das Mariñas conseguiron ser integrados en Vilas en Flor e foron distinguidos de novo polos seus programas ambientais: Arteixo acadou 3 Flores de Honra, mentres que Abegondo, Curtis, Oza-Cesuras e Sada foron recoñecidos con 2 Flores de Honra, e Culleredo recibiu 1 Flor de Honra.
Na provincia de Lugo, Chantada foi recoñecida con 4 Flores de Honra e Sarria cun 2 Flores de Honra.
Estas distincións valoran actuacións como a creación e mantemento de zonas verdes, a xestión eficiente da auga, a aposta por especies adaptadas e a integración da paisaxe nos usos cotidianos dos espazos públicos.
A gala, presidida polo presidente da Fundación Juana de Vega, Enrique Sáez Ponte, contou tamén coa participación da conselleira de Medio Ambiente, Ángeles Vázquez Mejuto, e do alcalde de Carballo, Daniel Pérez López. Durante o acto subliñouse que a paisaxe e os espazos compartidos son un factor clave de calidade de vida e que Vilas en Flor pretende espallar unha cultura de coidado e boa xestión do territorio desde os concellos rurais e de tamaño medio.
Desde 2018, o movemento Vilas en Flor Galicia traballa para mellorar a planificación, o deseño e a xestión das zonas verdes urbanas e rurais nos municipios galegos con menos de 40.000 habitantes.
Vilas en Flor é un programa anual que recoñece con entre 1 e 5 Flores de Honra a traxectoria e ás accións levadas a cabo polos concellos na mellora e potenciación dos seus espazos verdes urbanos, na xestión sostible, na educación ambiental e na concienciación cidadá para o coidado do entorno. En Galicia está impulsado pola Fundación Juana de Vega, en colaboración coa Asociación de Viveiristas do Noroeste (ASVINOR) e a Asociación Galega de Empresas de Xardinería (AGAEXAR).
A filosofía deste programa aposta por unha visión máis ecolóxica e sostible do territorio, combinando criterios estéticos e ecofuncionais e entendendo o paisaxe como un escenario no que conflúen valores ambientais, culturais, históricos e sociais, co obxectivo de crear mellores lugares para vivir.