Volven os 'Espazos das familias' os martes ao Páramo da man da Asociación Antonio Gandoy
![colexio do Paramo](https://sarriaxa.com/wp-content/uploads/2023/10/colexio-do-Paramo.jpg)
A Asociación socio-educativa Antonio Gandoy pon en marcha os 'Espazos das Familias', unha actividade que ten como obxectivo principal que as familias conten cun lugar e un tempo onde compartir, debater e reflexionar sobre a marabillosa experiencia da crianza dos nenos e nenas en colaboración co Concello do Páramo.
O obxectivo é que as familias coñezan cales son as actividades máis axeitadas para acadar o mellor desenvolvemento dos seus fillos e fillas tendo en conta a súa idade, tamén que as nenas e nenos podan atoparse con outros das mesmas ou parecidas idades e con diferentes adultos.
Esta actividade está dirixida a pais e nais de alumnado da Escola Infantil do Páramo, pero tamén poden acudir pais e nais que non teñan aos seus fillos nela, xa que é un espazo de Formación de Pais.
Así, estas actividades terán lugar os martes lectivos ás 11.00 horas no edificio do Concello de O Páramo para compartir dúbidas e experiencias coas demais familias, facendo actividades axeitadas a cada idade e respectando as medidas de seguridade e hixiene que a situación sanitaria requiraen cada momento.
Asociación Antonio Gandoy
A Asociación socio-educativa Antonio Gandoy é unha entidade sen ánimo de lucro que, conformada por extraballadoras da extinguida Fundación Preescolar na Casa, ten como misión principal preservar, difundir e dar continuidade á tarefa socioeducativa desenvolvida por Preescolar na Casa.
Ofrece ás familias con nenas e nenos de cero a seis anos a posibilidade do encontro e intercambio con outras familias e cunha profesional da educación, co fin de que poñan en valor o seu importante papel como educadoras e que compartan dúbidas.