Votorantim Cimentos presenta o seu proxecto para producir combustibles sólidos recuperados
Sarria foi o escenario elixido por Votorantim Cimentos, a empresa propietaria da fábrica de cemento de Oural, para presentar o seu novo proxecto.
Veciños do entorno e representantes das administracións locais e comarcais amosaron o seu interese pola nova planta que se instalará en Oural para producir combustibles sólidos recuperados (CSR) a partir de residuos que xa non se poden reutilizar nin reciclar. O proceso consiste na clasificación e trituración de materiais procedentes doutras industrias, nun 90 % plásticos, madeira e cartón. Para levar a cabo esta iniciativa, a compañía investirá 12 millóns de euros.
“Grazas a este proxecto – comentou a directora de Sostibilidade da compañía, Carmen Boulet– podemos dar unha segunda vida a uns materiais que irían parar ao vertedoiro e que, porén, se poden aproveitar como combustible debido ao seu poder calorífico, aplicando o principio de economía circular. Esta premisa é imprescindible para descarbonizar a actividade da industria e loitar contra os efectos do cambio climático”.
Os residuos que se van reciclar para transformalos en combustibles procederán da industria galega. Actualmente, o 14 % dos residuos industriais desta comunidade autónoma acaban no vertedoiro, polo que esta iniciativa supón unha solución segura, eficiente e medioambiental.
Durante a xornada, Boulet destacou que Votorantim Cimentos é unha empresa de materiais de construción e solucións sostibles con orixe e sede en Galicia e que unha das prioridades sempre foi apostar por esta rexión, fomentando o emprego de calidade e a riqueza nas zonas onde se asentan as súas instalacións. De feito, ademais da fábrica de cemento de Oural, conta con 10 plantas de formigón (Lugo, Pontevedra, A Coruña e Ourense); unha de morteiro na Coruña e cinco puntos de distribución (A Coruña, Pontevedra e Ourense) e cinco explotacións de áridos (A Coruña, Lugo e Pontevedra).
A cementeira de Oural iniciou a súa actividade en 1962 e foi a responsable do crecemento e desenvolvemento económico da comarca de Sarria. Co seu cemento, construíronse as principais obras emblemáticas, infraestruturas e edificios, como o Auditorio, o Museo Interactivo da Historia ou o Pazo de Feiras e Congresos, así como a ponte sobre o río Miño, en Lugo; o hospital de Ourense, os centros comerciais Nasas Nigrán e Vialia, ou as naves industriais da Organización de Palangreiros de A Guarda e de Frioya (Chapela-Pontevedra), entre moitas outras. Ademais, os seus formigóns abasteceron a extensión do AVE cara ao noroeste peninsular.
Todos os cementos fabricados en Oural, así como no resto das fábricas de Votorantim Cimentos en España, contan co certificado da Marca AENOR N Sostible. Esta marca é a primeira certificación no noso país que avala que un produto é sostible desde un enfoque ASG (Ambiental, Social e de Gobernanza).
Ademais, a compañía acaba de presentar a súa nova marca de cementos e formigóns, Blenture, deseñada para reducir as emisións de CO2 e promover unha construción máis sostible. Os cementos e formigóns agrupados baixo este selo ofrecen solucións competitivas para un gran número de aplicacións, mantendo as prestacións habituais de calidade, resistencia e rendemento, cun 30 % menos de pegada de carbono.
VALORIZACIÓN ENERXÉTICA
Para fabricar os seus produtos, as cementeiras precisan gran cantidade de combustible. O tradicional adoita ser un derivado do petróleo denominado ‘coque’. Co paso do tempo e en liña coa súa estratexia de sostibilidade, Votorantim Cimentos foi substituíndo unha porcentaxe do coque de petróleo por outros combustibles alternativos, como os que se producirán na plataforma que está proxectada en Oural.
A valorización enerxética é unha práctica probada nos países máis avanzados de Europa en canto a protección ambiental con máis de 50 anos de experiencia.
Actualmente, máis de 160 fábricas de cemento en Europa valorizan residuos e a Comisión Europea considera que o uso de combustibles procedentes de residuos nas fábricas de cemento é unha das mellores técnicas dispoñibles. Esta experiencia europea confirmou que o uso de combustibles derivados de residuos en substitución do coque de petróleo non modifica as emisións das fábricas de cemento e, polo tanto, non xera riscos engadidos sobre a saúde das persoas e o entorno.
Durante a xornada, o director da Fundación CEMA (Fundación do Cemento e o Medio Ambiente), Dimas Vallina, presentou a evidencia científica que certifica que o uso de combustibles alternativos en plantas cementeiras non supón riscos para a saúde nin para o desenvolvemento económico e social do entorno das plantas.
“Os estudos realizados tanto a nivel internacional (Axencia ambiental de Inglaterra e Gales, Universidade de Lisboa, Universidade de Xénova, Instituto Canadense de Toxicoloxía, entre moitos outros), como nacional (CSIC, as universidades de Alacante e Universidade Rovira i Virgili de Tarragona...), avalan que o uso de combustibles derivados de residuos non implica ningún risco ambiental nin de saúde engadido respecto ao uso de combustibles tradicionais”, asegurou Vallina.