A AC Taekwondo Sarria consegue 58 clasificacións para o Campionato Galego na fase provincial de Taboada

O AC Taekwondo Sarria conseguiu 58 clasificacións para a fase autonómica, que se celebrará o vindeiro 28 de novembro, tras participar esta fin de semana na fase provincial da Copa Xunta de Galicia, disputada en Taboada. O club sarriao acudiu finalmente con 82 deportistas de todas as idades, despois de varias baixas de última hora.
A entidade destacou a elevada participación e os resultados obtidos nunha competición que considera unha boa oportunidade para iniciarse no deporte competitivo, independentemente da idade ou da experiencia previa. Desde o club felicitaron tanto os deportistas clasificados como aqueles que non conseguiron o pase, e puxeron en valor o traballo realizado por todo o equipo e a evolución individual dos participantes.
A actividade non rematou coa competición provincial. Parte do equipo de combate desprazouse a Marín despois do campionato de Poomsae para participar nunha concentración organizada por Iván García, na que tamén recibiron consellos e orientación de David Robleto.
Ademais, o club participou nunha dobre sesión de adestramento cos compañeiros do Taekwondo Couto, con traballo específico de combate e Poomsae para preparar o próximo Campionato de España de Clubs.