A Asociación Cultural Peleriños de Sarria presenta a súa programación de maio
A Asociación Cultural Peleriños de Sarria vén de dar a coñecer a súa programación de actividades para o mes de maio, un calendario no que se combinan propostas culturais, festivas e formativas dirixidas a diferentes públicos.
A axenda comezará o 1 de maio coa celebración do Día das Traballadoras, ao que seguirá a Feira de Antigüidades de Sarria, prevista para os días 2 e 3, unha cita xa consolidada que reunirá exposición e venda de pezas antigas. O programa continuará o día 10 coa Feira de San Isidro, unha das datas máis destacadas do mes.
No eido cultural e formativo, o colectivo desenvolverá distintas actividades dentro do proxecto Sarria<30, entre elas un laboratorio de canto o 16 de maio, un laboratorio de danza o día 23 e un laboratorio final o 30 de maio, centrados na creación, aprendizaxe e participación da mocidade.
O 17 de maio a programación sumarase á celebración do Día das Letras Galegas, mentres que o 20 terá lugar o Día da Diversidade Cultural, reforzando o carácter aberto e participativo das propostas da asociación. Xa a finais de mes, o día 31, pecharase a programación cun fin de curso infantil en horario de mañá.
Ademais, a programación complétase con actividades de carácter tradicional como bandas de gaitas, mostras de canto e de baile tradicional, que forman parte da identidade cultural que a asociación vén promovendo ao longo dos anos.