A Asociación Cultural Val de Láncara prepara un verán cheo de actividades para todas as idades
A Asociación Cultural Val de Láncara xa traballa na organización da súa programación de verán, unha proposta que incluirá actividades pensadas para todos os públicos e que terá como principal obxectivo fomentar a participación veciñal e manter vivas as tradicións da comarca.
A primeira das citas terá lugar o vindeiro 23 de xuño coa celebración do Lume Novo, unha actividade vinculada á festividade de San Xoán. Esa mesma xornada, durante a tarde, desenvolverase tamén a Festa do Neno, unha iniciativa destinada aos máis pequenos para celebrar o remate do curso escolar. A programación incluirá diferentes atraccións inchables na contorna do río, ofrecendo unha tarde de lecer e diversión para as familias.
Ao longo dos meses estivais, a asociación organizará ademais varias sesións de cine de verán ao aire libre dirixidas a todos os públicos. Trátase dunha proposta que xa acadou unha notable acollida na edición anterior e que volverá formar parte da oferta cultural deste ano.
O punto culminante da programación chegará o 9 de agosto coa celebración da tradicional Festa da Malla, un dos eventos máis emblemáticos da asociación. Durante a xornada realizarase unha representación en directo do proceso tradicional de separación do gran de trigo da palla, unha demostración que permite divulgar e conservar os traballos agrícolas de outrora.
A festa completarase cun amplo programa de actividades que incluirá exposicións de artesanía, maquinaria e vehículos antigos, así como mostras gastronómicas. Ademais, a música tradicional terá un papel destacado coa celebración dunha Foliada na que participarán distintos grupos da provincia, convertendo a cita nun encontro de referencia para a cultura popular galega.