A comunidade educativa da Asunción de Sarria celebrará o ASUNFEST este sábado 30 de maio
A ANPA do colexio da Asunción de Sarria promoverá o vindeiro sábado 30 de maio o ASUNFEST, unha celebración creada co obxectivo de reunir diferentes xeracións vinculadas ao centro educativo e fomentar un espazo de convivencia entre alumnado, antigas alumnas e alumnos, familias e persoal que formou parte da historia do colexio.
As entradas poderán adquirirse na secretaría do centro ata o martes 26 de maio. O horario de venda será de luns a venres entre as 9:10 e as 11:00 horas, así como de luns a xoves de 16:00 a 17:00 horas.
A programación arrancará ás 18:00 horas nas propias instalacións da Asunción, onde as persoas participantes terán a oportunidade de visitar diferentes espazos do centro, degustar un doce de benvida e inmortalizar a xornada con fotografías. Este primeiro encontro busca recuperar lembranzas da etapa escolar e volver compartir os lugares que marcaron a infancia e mocidade de moitas xeracións.
Posteriormente, ás 20:30 horas, a celebración trasladarase a Meigallo, onde haberá unha selección de pinchos variados nun ambiente pensado para o encontro e a conversa. O menú terá un custo de 15 euros para persoas adultas e maiores de 13 anos, mentres que o menú infantil, destinado a menores de 12 anos, será de 12 euros. En ambos os casos incluirase auga.
Desde a organización sinalan que ASUNFEST nace coa intención de conectar pasado e presente a través dos recordos compartidos arredor do colexio, favorecendo o reencontro entre compañeiros e permitindo ás familias coñecer máis de preto o día a día actual do centro educativo.
A proposta preséntase como unha gran reunión da familia Asunción, na que terán cabida alumnado actual e antigo, nais e pais, docentes de distintas etapas, persoal do centro, relixiosas e tamén persoas que pasaron polo internado, creando así un espazo común para compartir experiencias e seguir construíndo novos recordos.