A Deputación destina preto de 246.000 euros á mellora da estrada entre Pacios e Mosteirovello
A Xunta de Goberno da Deputación de Lugo aprobou este venres a adxudicación das obras de renovación da estrada provincial LU-P-4201, que comunica Pacios con Mosteirovello, no concello de Paradela. A intervención suporá un investimento próximo aos 246.000 euros e permitirá actuar en case catro quilómetros da vía.
A empresa CONSTRUCCIONES Y OBRAS TABOADA RAMOS SLU será a encargada de executar os traballos, que se centrarán na renovación do firme, a mellora das cunetas e a reposición da sinalización.
O proxecto incorpora ademais unha actuación específica para incrementar a seguridade viaria nas proximidades do CEIP de San Miguel. Neste punto construirase un paso elevado destinado a reducir a velocidade dos vehículos e reforzar a protección nunha zona especialmente sensible pola presenza habitual de escolares.
A presidenta da Deputación, Carmela López, deu conta da adxudicación tras a reunión semanal da Xunta de Goberno celebrada no Pazo de San Marcos.
A intervención forma parte das actuacións da institución provincial destinadas á conservación e modernización da súa rede de estradas, neste caso coa renovación dunha vía que presta servizo ás comunicacións locais de Paradela.
Unha vez iniciadas as obras, a empresa adxudicataria contará cun prazo de catro meses para completar os traballos previstos na LU-P-4201.