A Deputación reforza a colaboración con Láncara con novos investimentos
A presidenta da Deputación de Lugo, Carmela López, visitou o concello de Láncara, onde mantivo un encontro institucional co alcalde, Darío Piñeiro, para avanzar en novos proxectos destinados á mellora das infraestruturas municipais. A xornada serviu para formalizar un convenio de colaboración centrado na conservación da rede viaria local e para coñecer sobre o terreo distintas actuacións executadas ou en marcha grazas ao apoio económico da institución provincial.
O principal acto da visita foi a sinatura dun acordo entre ambas administracións que permitirá destinar 263.806,80 euros á renovación de varios camiños municipais. A Deputación asumirá a maior parte do investimento, cunha achega de 250.000 euros, mentres que o Concello completará o financiamento restante.
As actuacións desenvolveranse nas parroquias de Pedreira, Láncara, Trasliste, Vilar de Toirán, Ronfe e Vilambrán, co obxectivo de mellorar o estado das vías, incrementar a seguridade na circulación e facilitar as comunicacións entre os diferentes núcleos do municipio.
Durante o acto, Carmela López puxo en valor a cooperación entre a Deputación e os concellos como ferramenta para atender as necesidades da cidadanía. A presidenta destacou que a mellora dos camiños municipais repercute directamente na vida diaria da veciñanza, ao facilitar os desprazamentos, favorecer o acceso ás explotacións agrogandeiras, aos servizos públicos e ás vivendas, ademais de contribuír á dinamización e á fixación de poboación no medio rural.
A responsable provincial tamén incidiu en que o traballo conxunto entre administracións permite optimizar os recursos públicos e facer realidade proxectos que, en moitos casos, resultarían difíciles de afrontar unicamente cos fondos municipais.
A visita incluíu ademais un percorrido polo Paseo da Estación, onde Carmela López comprobou o resultado das actuacións realizadas coa colaboración do Parque Móbil da Deputación e dun obradoiro de emprego. Estes traballos permitiron acondicionar este espazo público mediante a utilización de maquinaria e medios da institución provincial, mellorando a súa imaxe e funcionalidade para o uso da veciñanza.
Posteriormente, a presidenta desprazouse aos accesos do polígono industrial da Pobra de San Xiao para coñecer o proxecto de renovación do firme que contará cunha achega provincial de 50.000 euros. A intervención busca mellorar a seguridade e a accesibilidade da área empresarial, favorecendo a actividade económica e a implantación de novas empresas.
A xornada concluíu coa visita á nova rúa de acceso á praia fluvial da Pobra de San Xiao, unha actuación financiada a través do Plan Deputación 2025 cun investimento de 69.000 euros, dos que 60.000 foron achegados pola institución provincial. A obra permitiu humanizar este acceso, mellorar a mobilidade de peóns e vehículos e integrar de forma máis adecuada este espazo recreativo dentro da contorna urbana.