A DGT inicia este luns unha campaña especial de control do consumo de alcohol e drogas ao volante en Galicia
A Dirección Xeral de Tráfico (DGT) iniciará este luns, 13 de xullo, unha nova campaña especial de control da taxa de alcohol e da presenza de drogas nas persoas condutoras en Galicia. O dispositivo desenvolverase ata o domingo 19 de xullo e contará cunha especial incidencia nas zonas de turismo e lecer propias destas datas, moitas delas en ámbito urbano, promovendo tamén a participación dos concellos e das súas policías locais.
Segundo informou a Delegación do Goberno, o obxectivo da campaña é concienciar sobre os riscos do consumo de alcohol e drogas ao volante, que no ano 2024 foi o segundo factor concorrente máis habitual nos sinistros de tráfico.
Os datos da DGT indican que o alcohol estivo presente no 12 % dos sinistros rexistrados en 2024 e foi un factor concorrente no 28 % dos accidentes de tráfico con vítimas mortais, cun total de 273 casos asociados. Ademais, o 29 % das persoas condutoras falecidas ás que se lles practicou a proba de alcoholemia deron positivo, o que supón un incremento dun punto porcentual con respecto a 2023.
A DGT lembra que o consumo de alcohol afecta á capacidade para conducir ao incrementar o tempo de reacción, favorecer a subestimación da velocidade e provocar problemas de visión e coordinación. Tamén advirte de que os accidentes nos que están implicados condutores baixo os efectos do alcohol adoitan presentar consecuencias máis graves. Por iso, a campaña insiste en que “a única taxa realmente segura é 0,0 g/l”.
Na campaña equivalente realizada entre o 14 e o 22 de xullo de 2025 efectuáronse en Galicia 31.139 controis e impuxéronse 928 sancións por positivos en alcohol ou drogas. Delas, 515 corresponderon a positivos por alcohol e 413 por drogas.
Por provincias, realizáronse 12.531 probas na Coruña, das que 12.138 foron de alcohol e 393 de drogas; 7.493 en Lugo, con 7.297 probas de alcohol e 196 de drogas; 6.617 en Ourense, das que 6.456 foron de alcohol e 161 de drogas; e 4.498 en Pontevedra, con 4.417 controis de alcohol e 81 de drogas.