A ESMUSA de Sarria abre o prazo extraordinario de matrícula ata o 11 de setembro
A Escola Municipal de Música de Sarria (ESMUSA) ten aberto o período extraordinario de matrícula, un novo prazo destinado tanto ás persoas que desexen incorporarse ao centro como a aquelas que necesiten emendar posibles erros nas inscricións xa realizadas.
O prazo permanecerá aberto ata o 11 de setembro. Durante estes días poderanse formalizar novas matrículas, así como realizar as correccións correspondentes unha vez publicada a listaxe provisional de persoas inscritas.
As persoas interesadas en iniciar ou continuar a súa formación musical na ESMUSA poderán solicitar praza nun amplo catálogo de especialidades. Entre elas atópanse acordeón, clarinete, frauta, gaita, linguaxe musical, guitarra, música e movemento, estimulación musical temperá, coro, percusión, piano, trombón, trompeta, saxofón, tuba e bombardino.
Con este período extraordinario, a Escola Municipal de Música de Sarria ofrece unha nova oportunidade para aquelas persoas que non formalizaron a súa matrícula no prazo ordinario ou que necesiten revisar os datos da inscrición presentada.