A Furgoteca achegará a lectura ao Incio durante o mes de febreiro con dúas rutas polo concello
A Furgoteca, o servizo de bibliotecas móbiles de Galicia impulsado pola Xunta, volverá ao concello do Incio durante o mes de febreiro cun calendario de visitas que permitirá achegar a lectura a distintos puntos do municipio. A iniciativa desenvolverase a través de dúas rutas diferenciadas, con paradas en centros educativos, sociais e varias localidades do termo municipal.
A primeira das xornadas terá lugar o día 6 de febreiro, cando a Furgoteca percorrerá varios puntos do concello ao longo da mañá e da tarde. A ruta comezará ás 10:30 horas no CEIP Ricardo Gasset e continuará na Casa Niño Cabianca, en Eirexalba, ás 11:20 horas. A partir das 12:00 horas realizaranse paradas en Laiosa 1, no Polvoreiro, e en Laiosa 2, no Sío, para posteriormente desprazarse á Casa do Maior de Penaxubeira ás 13:00 horas. A xornada proseguirá ás 14:05 horas na Cervela, no centro sociocultural, e finalizará en Santo Eufrasio, no Val do Mao, cunha parada prevista entre as 15:00 e as 15:30 horas.
A segunda visita está programada para o día 22 de febreiro, cunha ruta única que se desenvolverá entre as 11:00 e as 15:10 horas en distintos puntos do concello do Incio, permitindo así o acceso ao servizo a un maior número de veciños e veciñas.
A Furgoteca é un proxecto da Xunta de Galicia que promove o acceso á lectura e á cultura a través de bibliotecas itinerantes, facilitando o préstamo de libros e materiais audiovisuais e fomentando o hábito lector en contornos rurais.