A música e as verbenas protagonizarán as festas de San Xosé Obreiro de Oural
A parroquia de Oural, no municipio de Sarria, vivirá os días 18, 19 e 20 de xullo as súas tradicionais festas na honra de San Xosé Obreiro, cun amplo programa de actividades no que non faltarán a gastronomía popular, os actos relixiosos e a música en directo.
As celebracións arrancarán o sábado 18 de xullo, ás 22.00 horas, cunha pancetada veciñal, seguida dunha verbena amenizada por Deluxe Discomóbil.
O domingo 19 de xullo será a xornada principal das festas. Ás 13.00 horas celebrarase a misa maior na igrexa de San Xosé Obreiro de Oural, seguida da procesión e da tradicional sesión vermú, que estará amenizada pola orquestra Costa Dorada. Xa pola tarde, ás 19.00 horas, actuará o grupo Louband, mentres que a partir das 22.00 horas dará comezo unha gran verbena coa participación das orquestras Costa Dorada e New York.
O programa concluirá o luns 20 de xullo. Ás 13.00 horas celebrarase a misa maior na igrexa de Chorente, seguida da procesión e da sesión vermú, amenizada por un grupo musical. Pola noite, ás 22.00 horas, a verbena correrá a cargo do Grupo Musical Cinema, encargado de pechar as celebracións.
A comisión organizadora anima á veciñanza e aos visitantes a participar nestas festas, que cada ano reúnen a centos de persoas para compartir tres xornadas de convivencia, tradición e ambiente festivo.