A Noite Meiga reforza a súa conexión co comercio local cunha campaña de premios para os clientes
A conta atrás para a celebración da Noite Meiga xa está en marcha en Sarria e este ano chegará acompañada dunha nova iniciativa para implicar ao comercio local na festa. A Asociación de Comerciantes e Empresarios de Sarria (Aces) e a asociación Meigas e Trasgos presentaron unha campaña promocional coa que buscan animar as compras na vila durante os días previos a unha das citas máis emblemáticas do verán sarrián.
Entre o 3 e o 11 de agosto, todas as persoas que realicen compras nos establecementos adheridos á campaña poderán participar nun sorteo de diferentes premios. Entre eles figura unha cea para catro persoas na terraza de O Meigallo e vinte camisetas de edición limitada relacionadas coa celebración.
Para entrar no sorteo, os clientes deberán rexistrar os seus datos e subir unha fotografía do tícket de compra a través dunha plataforma web á que se poderá acceder mediante un código QR distribuído nos negocios participantes. Unha vez rematado o prazo da promoción, realizarase o sorteo e contactarase coas persoas premiadas.
Durante a presentación da iniciativa, o presidente de Aces, Ricardo Arias, destacou a importancia de sumar esforzos para seguir impulsando unha celebración que se consolidou como unha das grandes referencias festivas da comarca. Pola súa banda, representantes de Meigas e Trasgos subliñaron que a colaboración co tecido empresarial resulta fundamental para fortalecer o arraigo da festa e incrementar a participación veciñal.
Ambas entidades avanzaron ademais a súa intención de seguir traballando conxuntamente en futuras edicións para promover novas actividades que contribúan a potenciar a Noite Meiga, recentemente recoñecida como Festa de Interese Turístico de Galicia, e reforzar o seu impacto social e económico na vila.