A oposición fala: Iván Castro, portavoz do PSOE en Paradela

SarriaXa

Por Jessica Fernández.
Iván Castro Paradela
Iván Castro Paradela
14 abr 2024

Por Jessica Fernández.

Iván Castro, portavoz do PSOE de Paradela, define a política local como “a máis bonita, porque vexo o efecto que causa nos meus veciños”.

A Iván Castro, portavoz do PSOE en Paradela, sempre lle gustou a política desde moi neno. “O meu primeiro recordo foi a vitoria de Zapatero no 2004, cando eu tiña 12 anos”, sostén. Por iso, cando cumpriu os 16, o primeiro que fixo foi afiliarse e participar nas Xuventudes Socialistas, pero “sen dicir nada na casa”.

Así, forma parte do Partido Socialista de Paradela desde o 2016, cando estaba  compañeira Sonsoles de secretaria xeral do partido político. Despois dela, “un equipo novo presentámonos á secretaría xeral, e dende aí, aquí seguimos”. Esta é a segunda lexislatura na que Castro é concelleiro en Paradela.

Para Iván, a política local “é a máis bonita para a miña forma de velo, xa que vexo directamente o efecto que causa nos meus veciños” e o papel da oposición “sempre ten que ser construtivo, non estar todo o tempo no non”, explica. En Paradela moitos dos puntos nos plenos saen por unanimidade, “cando son casos de sentido común e de defender aos nosos veciños”. Despois, explica, “no executivo de obras ou servizos, cada un temos o noso punto de vista e as prioridades lóxicas da ideoloxía ou da perspectiva persoal, pero non estamos en contra de ningunha mellora para a nosa poboación, sexa da administración que sexa. Tentamos dar o punto de vista nas cousas que vemos, pero temos claro que a última palabra lle pertence ao Goberno municipal e á alcaldesa, que foron os que obtiveron máis apoios nas eleccións e, polo tanto, a potestade de gobernar estes catro anos”, defende o concelleiro socialista.

Con respecto a como axuda o PSOE a mellorar a vida dos veciños, Iván Castro defende que “nós tentamos escoitar aos veciños e axudar no que podemos, tendo en conta que non temos competencias executivas no eido municipal. Moitas veces os veciños o que precisan é información, e dentro do que sabemos tentamos proporcionala”.

A POLÍTICA, A NIVEL PERSOAL

Para Castro a política “é unha forma de vida pola que optamos voluntariamente sendo conscientes de que automaticamente te pos no disparadero; pero, por outra parte, é moi satisfactorio coñecer a todos os veciños e tentar axudalos nas súas inquedanzas e problemas”.

Porén, o principal problema, destaca, “é o tempo que ocupa, xa que sempre é a maiores das nosas ocupacións laborais, ao marxe da política, que nos proporcionan o salario que todos necesitamos para vivir, pero merece sempre a pena cando ves que podes axudar aos veciños e coñeces a moita xente coas mesmas inquedanzas das que se pode aprender moito”, argumenta.

Ademais, cre que o obxectivo de toda a xente que se dedica á política local “é ou debera ser mellorar a vida dos veciños e facilitarlles as cousas, e así o sentimos nós. Gustaríanos poder poñer en práctica os noso proxectos para Paradela e confiamos en que pronto os veciños confíen maioritariamente no noso equipo municipal para levalos a cabo”.

Por outra banda, di que está a favor de que os gobernos gobernen, “e as oposicións deixen gobernar sen paus nas rodas, facendo o seu traballo pensando no ben dos cidadáns. Todos os gobernos están para buscar a mellora das condicións dos veciños e do país, e todos os cidadáns nos podemos expresar nas eleccións regularmente convocadas. Gustaríame un parlamento menos fragmentado cunhas maiorías máis estables, pero os cidadáns españois deron esta situación, e con iso hai que facer o cesto. A labor do parlamento e da política é negociar e chegar a acordos cos representantes elixidos por todos nós, polo ben dos cidadáns e espero que esta máxima sexa a que rexa todos os parlamentos e gobernos, dende a UE ata os concellos”.

AS NECESIDADES

Por último, destacada as necesidades de Paradela, referíndose a un “Concello envellecido con necesidades sociais moi importantes dentro do coidado dos nosos maiores, que debe ser primordial”. Pero tamén cre que se lle debe facilitar a vida aos nosos novos “a posibilidade de poder aumentar as prazas para nenos de 0 a 3 anos, e, sobre todo, tentar crear postos de traballo, tanto públicos como atraendo novas empresas e negocios”.

Así, destaca que a Deputación está rematando o aparcadoiro que había proxectado no polígono, “sen o cal non se podía dar o fin de obra por parte dos técnicos e dificultaba as posibilidades do noso polígono”.

E, para finalizar, pon o foco no agro e o rural, “ao cal lle hai que facilitar o traballo cunhas boas comunicacións en camiños e estradas, así como a nosa aposta de bonificar o IBI rural para non cargalos máis de impostos e solucionarlles un dos problemas que van vir con forza, como é o tema da auga. Todo isto debe contribuír a que máis xente elixa o noso concello para vivir e formar unha familia”, conclúe.