A parroquia sarriá de Biville recupera a romaría de San Marco sete anos despois
A parroquia sarriá de Biville volverá celebrar a romaría de San Marco sete anos despois da súa última edición, recuperando así unha tradición fondamente arraigada na identidade cultural da zona. O encontro terá lugar o sábado 25 de abril de 2026 no Alto do Páramo, que volverá converterse en punto de reunión para veciñanza e visitantes.
A celebración dará comezo ás 13:00 horas cunha misa maior na Capela de San Marco, seguida da procesión e da sesión vermú, que estará amenizada polo grupo Luces de Bohemia. Ademais, durante a xornada haberá servizo de pulpería ao estilo feira, ofrecido pola Pulpería Javier e Susana, con opción de menú concertado previa reserva a través da comisión de festas.
Xa pola tarde, a partir das 18:00 horas, continuará a programación festiva coa actuación musical do grupo Luces de Bohemia, que porá ritmo a unha xornada pensada para o encontro e a convivencia.
A romaría, máis alá do seu carácter lúdico, supón unha oportunidade para preservar e poñer en valor un legado que se transmite de xeración en xeración. Neste sentido, a Capela de San Marco destaca tanto pola súa relevancia histórica como pola súa localización nun enclave natural privilexiado, representativo da esencia do rural galego.
A concelleira do Partido Popular de Sarria, Carmen José López, quixo salientar o traballo da comisión de festas e da veciñanza implicada na recuperación desta cita, agradecendo o seu esforzo por manter vivas as tradicións e evitar que se perdan co paso do tempo.