A Pobra de San Xiao acolle este sábado a III Carreira Andaina Solidaria de Nadal organizada polo Puebla Futsal
A Pobra de San Xiao acollerá este sábado 3 de xaneiro a terceira edición da Carreira Andaina Solidaria de Nadal organizada polo Puebla Futsal, unha cita de carácter deportivo e solidario que ten como obxectivo recadar fondos a beneficio da Asociación Obxetivo Diagnóstico. A saída da proba está prevista para as 19:00 horas e terá lugar na Urbanización Praias de Valdriz, desde onde as persoas participantes completarán un percorrido urbano de 3500 metros polas rúas da vila.
A iniciativa está aberta a todos os públicos e combina o espírito deportivo co compromiso social, nun ambiente festivo propio destas datas do Nadal. O prezo do dorsal será de 1 euro para os menores de 16 anos e de 4 euros para as persoas maiores desa idade, podendo adquirirse en distintos establecementos colaboradores da zona. A organización tamén confirmou que, ao remate da carreira andaina, haberá unha chocolatada gratuíta para todas as persoas participantes.
O evento está promovido polo Puebla Futsal e conta coa colaboración de diversas entidades e comercios, así como do Concello de Láncara. A proba consolídase así como unha cita xa tradicional no calendario deportivo e solidario da comarca, coa que se pretende fomentar a participación cidadá e apoiar unha causa social a través do deporte.