Deportes

A iniciativa organizada polo Puebla Futsal congregou a veciñanza e numerosas familias no Campo da Feira nunha xornada que tamén serviu para celebrar o recente ascenso do club

A Carballeira do Campo da Feira da Pobra de San Xiao converteuse este sábado nun espazo de encontro coa celebración da primeira Festa da Carballeira, unha iniciativa impulsada polo Puebla Futsal que combinou deporte, gastronomía, música e actividades de lecer.

A cita congregou veciños, veciñas e familias nunha xornada pensada para compartir e desfrutar nun ambiente festivo. O programa incluíu sesión vermú, xantar popular, propostas infantís, sorteos e música, favorecendo a participación de públicos de todas as idades.

Entre os asistentes estivo o alcalde de Láncara, Darío Piñeiro, que se sumou á celebración e destacou o traballo realizado polo Puebla Futsal para sacar adiante esta primeira edición.

A festa tivo ademais un significado especial para o club, xa que serviu para compartir coa afección e coa veciñanza a alegría polo seu recente ascenso. O logro deportivo converteuse así noutro dos protagonistas dunha xornada coa que a entidade quixo reforzar os vínculos entre o equipo e o municipio.

A primeira Festa da Carballeira pechouse cun balance positivo de participación, combinando a celebración dos éxitos deportivos do Puebla Futsal cunha proposta de convivencia aberta á veciñanza da Pobra de San Xiao.