A SD Paradela reforza o seu proxecto con catro incorporacións para a nova tempada
A SD Paradela continúa dando forma ao seu cadro de persoal para a próxima tempada coa incorporación de catro futbolistas que reforzarán o proxecto deportivo da entidade. O club anunciou os regresos de Carlos López, coñecido deportivamente como Barán; Daniel Rodríguez, Daniño; e Javier López Folgueiras, Javi, aos que se suma a fichaxe de Gerardo Do Nascimento, Gerï, procedente da SD Rubián.
Entre as incorporacións destaca a volta de Barán, unha das figuras máis representativas da historia recente da SD Paradela. O xogador, que sempre estivo vinculado ao club, foi capitán do equipo durante 14 tempadas consecutivas, converténdose nun referente tanto dentro como fóra do terreo de xogo. Desde a entidade destacan o seu liderado, compromiso e coñecemento do club, aspectos que consideran fundamentais para o vestiario.
Tamén regresa Daniño, natural de Aldosende e outro dos futbolistas identificados coa historia da entidade. O club salienta a súa experiencia, veteranía e capacidade de entrega, así como o seu carácter competitivo e o sentimento de pertenza á SD Paradela.
Outro dos regresos anunciados é o de Javi, que retorna ao equipo tras o seu paso pola SD Rubián. O futbolista defendeu a camisola do Paradela durante 16 tempadas consecutivas e exerceu como capitán, deixando unha fonda pegada na historia recente do club. Despois dun período afastado dos terreos de xogo por mor dunha lesión, afronta esta nova etapa coa intención de achegar experiencia e servir de referencia para os xogadores máis novos.
A estas incorporacións únese Gerï, tamén procedente da SD Rubián. Natural de Monforte de Lemos, chega ao conxunto paradelense para reforzar o potencial ofensivo do equipo grazas á súa velocidade, capacidade de desequilibrio e calidade polas bandas.
Desde a SD Paradela amósanse satisfeitos coas incorporacións realizadas e confían en que a combinación de experiencia, coñecemento do club e novas achegas permita afrontar con garantías os retos da próxima tempada.