A Unión de Sarria e o Bóveda Slam Poetry organizan unha xornada dedicada á poesía falada
A Sociedade A Unión de Sarria acollerá o vindeiro xoves 9 de xullo unha nova actividade cultural centrada na poesía falada grazas á colaboración entre A Unión de Sarria e Bóveda Slam Poetry.
A iniciativa, con entrada libre, desenvolverase a partir das 20:00 horas e buscará converter o espazo nun punto de encontro para a creación literaria, a emoción e a participación do público.
O evento estará aberto á participación de persoas interesadas en recitar as súas propias composicións. Para formar parte da cita será necesario inscribirse previamente enviando o nome e un número de contacto ao correo electrónico habilitado pola organización.
As persoas participantes deberán presentar dous poemas de creación propia, que poderán estar escritos en calquera idioma, cunha duración inferior aos tres minutos por intervención.
A organización lembra ademais que o público tamén terá un papel activo durante a actividade, xa que poderá participar nas votacións en directo para escoller os poemas favoritos da xornada. Desde a entidade destacan que o formato Slam Poetry busca precisamente fomentar unha experiencia compartida na que tanto quen sobe ao escenario como quen asiste desde o público forme parte do espectáculo.