A XXVIII Xuntanza de Peleriños reunirá en Sarria agrupacións de Galicia e Castela-A Mancha nunha xornada de tradición e música
A Asociación Cultural Peleriños volverá converter Sarria nun punto de encontro para a música e o folclore tradicional coa celebración da súa XXVIII Xuntanza, unha cita xa consolidada no calendario cultural da vila e que cada ano reúne a numerosos amantes das tradicións populares.
A edición deste ano terá lugar o vindeiro 4 de xullo e contará coa participación especial de Coros y Danzas Villa de Madridejos, procedente da provincia de Toledo, que compartirá escenario co colectivo anfitrión nun intercambio cultural que permitirá achegar ao público diferentes expresións da música e da danza tradicional.
A programación arrancará ás 19.30 horas cun pasarrúas que percorrerá as rúas de Sarria desde o Malecón, levando o ambiente festivo ata distintos puntos da localidade. Posteriormente, ás 20.00 horas, a actividade trasladarase á Praza da Vila, onde terán lugar as actuacións das agrupacións participantes.
A xornada continuará coa exhibición de bailes e pezas musicais tradicionais, nun encontro pensado para divulgar o patrimonio cultural e favorecer o intercambio entre formacións chegadas de distintos territorios.
Como peche da celebración, o Malecón acollerá ás 00.30 horas un concerto da Murga de Cántigas e Frores, encargada de poñer o punto final a unha noite na que a música popular e a convivencia volverán ser as grandes protagonistas.
Desde Peleriños destacan a importancia de manter vivo este encontro, que ao longo das súas case tres décadas de historia se converteu nun referente para a promoción da cultura tradicional. A asociación tamén agradeceu a colaboración das entidades e institucións que fan posible a organización desta nova edición.