Benjamín García Toirán culmina o relevo e asume a Alcaldía de O Páramo
Benjamín García Toirán é o novo alcalde do Páramo. O ata agora primeiro tenente de alcalde foi investido este xoves nun pleno extraordinario, culminando un relevo que xa se producira na práctica debido á prolongada ausencia de José Luis López por razóns de saúde.
A candidatura de García Toirán recibiu os seis votos do Partido Popular, que mantén a maioría absoluta na Corporación municipal. Os tres representantes de Galicia Sempre votaron en contra, polo que o novo rexedor asumiu o bastón de mando co respaldo do seu grupo.
A sesión comezou coa toma de posesión de María Luisa Fernández como nova concelleira do PP. A sanitaria ocupaba o seguinte posto dispoñible na candidatura popular presentada ás eleccións municipais de 2023 e entra na Corporación para cubrir a vacante deixada por José Luis López.
O novo alcalde chega ao cargo cun amplo coñecemento da xestión municipal. García Toirán xa exercía as funcións da Alcaldía por substitución durante a enfermidade do anterior rexedor, asumindo competencias de dirección, xestión e resolución de procedementos administrativos. A delegación destas responsabilidades xa figuraba formalmente en documentos municipais publicados en 2024.
José Luis López fixo efectiva a súa saída da Corporación nun pleno extraordinario celebrado a finais de maio. A renuncia pechou unha etapa marcada pola súa baixa médica, que o mantivo apartado durante máis dun ano da actividade diaria do Concello, aínda que asistiu á investidura para acompañar ao seu sucesor.
O relevo non suporá inicialmente un cambio na orientación do Goberno local. García Toirán, gandeiro de profesión e ata agora responsable municipal de Deportes, avanzou a súa intención de continuar os proxectos en marcha, manter o contacto coa veciñanza e favorecer o diálogo dentro da Corporación.
A chegada de Benjamín García á Alcaldía dá continuidade á maioría conseguida en 2023 por José Luis López. O anterior rexedor iniciara a súa traxectoria política en 2019 á fronte da agrupación Todo polo Páramo, coa que chegou ao Goberno municipal mediante un acordo co representante socialista.