Deportistas da comarca lograron destacados resultados no III Campionato Galego e Interautonómico de Kung Fu
O Concello de Cervo, en colaboración coa Federación Galega de Kárate, acolleu no Pavillón do CEIP Península da Paz a celebración do III Campionato Galego de Kung Fu e do III Interautonómico desta disciplina, unha cita deportiva que reuniu máis de 150 participantes procedentes de distintos puntos de Galicia e doutras comunidades autónomas como Asturias, Castela e León, Cantabria, País Vasco e Madrid.
A competición contou cunha ampla participación de deportistas de diferentes categorías e modalidades, converténdose nun punto de encontro para practicantes desta disciplina chegados de distintos territorios.
Entre os resultados máis destacados figuraron os acadados polas deportistas lancaresas Marina Fernández e Xiana Bande, que lograron a primeira e segunda clasificación en varias modalidades. Ademais, Cristian Vázquez, natural do Páramo, conseguiu tamén subir ao máis alto do podio tras facerse coa primeira posición na súa categoría.
Os tres deportistas forman parte do grupo de alumnos de José Manuel Nunes, sumando novos éxitos deportivos nun campionato que reuniu a participantes de diferentes comunidades e niveis competitivos.