A parroquia de Cervela do Incio e a de Ferreiros de Paradela celebran as súas festas esta fin de semana
Esta fin de semana celebran dúas parroquias da comarca de Sarria as súas festas na honra a Santa Lucía. Tanto A Cervela, parroquia do Incio, como Ferreiros, de Paradela, inclúen actividades durante varios días para todos os veciños e veciñas e para as persoas interesadas que se acheguen.
Pola parte da parroquia de Cervela, o sábado 26 terá lugar unha pancetada e unha queimada popular que virá acompañada da verbena amenizada por Verónica Cambón; mentres que o domingo 27 terá lugar a misa maior ás 13.30 horas e unha procesión con danzas tradicionais. Xa pola tarde será a quenda do grupo rexional e haberá unha sesión vermú da man da orquestra Alianza, que estará durante a tarde e pola noite.
Xa o luns, 28 de agosto, haberá de novo misa maior e procesión con danzas tradicionais, tamén a actuación dun grupo rexional e unha sesión vermú amenizada coa orquestra Trebol, que estará durante toda a tarde na festa e na verbena ata a noite.
Pola súa banda, na parroquia de Ferreiros de Paradela serán dous días, o domingo e o luns, os que acollerán as festas. Así, o domingo 27 haberá misa solemne ás 13.30 horas e despois os pasacalles a cargo da Banda Municipal de Paradela que virá seguido dunha sesión vermú e gran verbena coa orquestra Trebol. Xa o luns, terá lugar a misa ás 13.30 horas acompañada do coro Sarricanta e a sesión vermú e verbena coa orquestra Compostela. A festa rematará ás 21.30 horas coa actuación da charanga Bicoia.