La Unión abre as inscricións para a primeira Feira de Artesanía de Sarria
A Sociedade Cultural La Unión de Sarria abriu o prazo de inscrición para participar na primeira edición da súa Feira de Artesanía, unha iniciativa que se celebrará os días 19 e 20 de setembro co obxectivo de dar visibilidade ao talento creativo e aos produtos elaborados de forma artesanal.
A organización fai un chamamento a artesáns, creadores e produtores de alimentación artesanal para que se sumen a esta proposta, concebida como un espazo de encontro e promoción do traballo artesanal e dos proxectos locais.
A participación será gratuíta e os expositores disporán dun local cuberto con acceso a electricidade. Ademais, a Sociedade Cultural La Unión facilitará as mesas necesarias para a instalación dos postos. Os participantes poderán optar por asistir unha soa xornada ou durante toda a fin de semana.
Desde a organización explican que terán prioridade os postos relacionados coa artesanía e a alimentación artesanal, así como aqueles expositores que confirmen a súa presenza durante os dous días da feira.
O prazo de inscrición permanecerá aberto ata o vindeiro 1 de setembro. As solicitudes poderán formalizarse a través do teléfono 650 089 556 mediante mensaxes de WhatsApp.
As prazas son limitadas e a asignación dos espazos realizarase en función da dispoñibilidade e das características da actividade proposta.
Coa posta en marcha desta primeira edición, La Unión pretende crear un escaparate para a artesanía, a creatividade e o talento local, ao tempo que ofrece un novo atractivo cultural e comercial para a vila.