María Barrado, poeta e pintora: “Para min, escribir e pintar son unha terapia para a alma”
Jessica Fernández
“Empecei a escribir como unha forma de ter unha vía de escape para todo o que estaba sentindo”, así relata María os seus comezos coa escritura, que vén desde hai anos, xa que “levo moito tempo con problemas de ansiedade e depresión, e para min escribir poemas era unha maneira de expresarme”, sostén.
O poemario ‘Amor Exia’ é unha composición de poemas “precisamente xurdidos nese desenvolvemento da miña persoa, na que pasei desde a ansiedade á depresión a través da morte da miña nai. Tamén pasei por unha anorexia que xa superei e iso marcou tamén moitos dos meus poemas, que dan como resultado este libro, que trata sobre as distintas fases polas que pasei en canto á miña saúde mental”, explica a escritora.
Así, con respecto ao título, di que é un xogo de palabras “Amor Exia é unha mestura entre o amor por unha mesma; e Exia pola anorexia. Ao final, o que saca unha de todas esas malas experiencias é o amor por unha mesma, xa que hai xente que sae de aí e outra que non, e a que sae é grazas a ese amor propio e tamén o que che transmiten as persoas do teu redor que están ao teu lado cando pasas por todo isto. Así, miras cara a atrás e decides que te vas querer un pouco máis”, defende.
Este poemario é a súa primeira obra, composta por 36 poemas de diferentes momentos “da miña vida; algúns teñen 5 ou 6 anos e outros son máis recentes”, comenta. “A maioría son bastante duros, pero hai moitos que son esperanzadores, tamén por iso se chama ‘Amor Exia’, xa que en todos saco a forza de saír adiante e mostro a importancia de non sentirse só; que sempre se pode pedir axuda, sempre hai alguén aí e que se pode saír”, argumenta.
A ACOLLIDA DA OBRA
“Estou moi ilusionada, pero tamén algo sorprendida comigo mesma porque é algo que nunca pensei que chegaría a facer; sempre quixen publicar unha obra, pero non pensaba que chegara a facelo, non me sentía capaz. Tamén sinto algo de medo porque me espido moito neste poemario, xa que é moi sincero e sensible; estou contando a miña historia, a xente vaime coñecer ao 100 %, pero a saúde mental non a elixes, nin que che pasen esas cousas, é algo que che toca e non se pode evitar”, manifesta a escritora.
Na primeira presentación da obra, que terá lugar o venres, 7 de marzo, na Casa da Cultura, estará acompañada do tamén poeta e promotor do Bóveda Slam Poetry, Xosé Casar. “É o meu padriño, e sen el eu non tivera sacado este libro. Un día, sacoume nun micro aberto no Xarope e atrevinme a recitar poesías. Logo, propúxome participar no Bóveda Slam Poetry e agora estou finalista. O seu apoio, así como o de Yolanda Alcas, foi o que me tirou máis por todo isto, por iso pedinlle eu que viñera ás primeiras presentacións, polo que é un orgullo e unha honra que estea comigo”, pon en valor.
Ademais, tamén valora o apoio do Concello de Sarria, xa que a través de María Casar, coa que está no obradoiro de escritura creativa, chegou ata o concelleiro de Cultura, César No, quen “me propuxo presentar o meu poemario na Casa da Cultura, polo que o avisei cando me chegaron os libros impresos e axendamos unha data, o que me fai ver que está implicado coa sociedade e a cultura da súa vila”, comenta.
Pero no que máis énfase pon a María Barrado é na acollida por parte da veciñanza, xa que ela non é de Sarria, “pero levo moitos anos aquí e síntome como unha máis. Desde o primeiro momento a acollida foi impresionante. Teño aquí moitísima xente que me fai ver que me quere e, de feito, saquei o libro e xa levo moitísimas reservas e vendidos. Noto o cariño da xente e paréceme unha vila riquísima a nivel cultural. Eu alucinei cando cheguei porque me falaran de que era un ‘pueblo’, pero é unha vila chea de xente nova, de músicos, de escritores, de xente que quere facer cousas... e iso encántame”, destaca.
O FUTURO
Para María, o futuro é claro: “Seguirei escribindo. De feito, xa teño poemas escritos e vou seguir nese camiño. Ademais, voume meterme en todo o que poida a nivel cultural porque esta vila é moi rica e desfrutando disto, a min estame curando a alma”, recoñece.
Ademais da escritura, a María Barrado tamén lle gusta pintar, por iso ten exposta en Creativa Sarria unha mostra de 28 obras nas que se poden ver tanto cadros pintado con acuarelas como tamén con debuxo lineal. “A pintura axúdame coa miña saúde mental, igual que o fai a escritura, é como unha terapia, por iso seguirei pintando tamén e, se me deixan, expoñendo as miñas creacións”.
Así, di que o seu estilo é “propio e abstracto na pintura, aínda que me inspiro polo que vexo por Internet e o que fago é produto diso; e puramente experiencial no literario”, polo que non ten un artista concreto do que se inspira, senón que vai escribindo e pintando o que lle sae. “Agora tamén estou empezando co óleo e a ver que sae de aí, irei pouco a pouco”, conclúe.